Skráning

Hægt verður að panta á mínum síðum rútuferðir, morgunmat í Hrauneyjum og Heitan mat í Húsadal frá 1. febrúar til 1. júlí 2025. Inná mínum síðum munum við einnig vera með vefverslun með varning sem nýtist þér vel í hlaupinu.

Rútuferðir frá Reykjavík í Landmannalaugar og til Reykjavíkur frá Þórsmörk, morgunverður í Hrauneyjum og heit máltíð að hlaupi loknu er ekki innifalin í þátttökugjaldinu. Tekið verður á móti pöntunum fyrir þessa þjónustu frá þeim sem vilja á „Mínar síður" frá 1. febrúar til 1. júlí. Sjá nánar um rútuferðir hér og mat hér.

Í skráningarferlinu er hægt að velja um að greiða þátttökugjaldið með öllum helstu tegundum af greiðslukortum og/eða gjafabréfi. Að lokinni skráningu fær viðkomandi sendan tölvupóst skráningunni til staðfestingar. Berist ekki póstur hefur skráning ekki gengið í gegn.

Greitt er fyrir þátttöku með greiðslukorti. Þeir hlauparar sem fá ekki úthlutað skráningu 20. nóvember og fara á biðlista fá endurgreitt á kortið sitt fyrir 27. nóvember.
* ÍBR tekur 13.750 kr umsýslugjald við vinnslu umsóknar þeirra sem komast inn í hlaupið, þetta er hluti af skráningargjaldinu. Þessi hluti gjaldsins er ekki endurgreiðanlegur (fyrir þau sem komast inn í hlaupið).

Að umsóknarfresti liðnum fer starfsfólk ÍBR yfir ITRA stig hlaupara með því að keyra saman gagnagrunn ITRA og skráningarkerfi Laugavegshlaupsins. Ákveðinn fjöldi sæta í hlaupið fer til stigahæstu hlauparanna. Allar gildar umsóknir fá slembitölu. Úthlutun slembitalna á umsóknum er framkvæmd af starfsmanni ÍBR og fulltrúa frá langhlaupanefnd FRÍ og verður síðan dregið úr þeim umsóknum í lottó.

Þátttökuskilyrðin fyrir skráningu í Laugavegshlaupið 2025 eru 370 ITRA stig. Mikilvægt er að öll skoði vel ITRA stigin sín og skrifi þau rétt inn í skráningarkerfið. Ef umsækjandi hyggst ekki nýta skráninguna sem hann hefur fengið úthlutað og greitt, skal hann láta ÍBR vita með því að senda póst á info@marathon.is. Ekki er hægt að færa skráninguna yfir á næsta ár.

ITRA eru alþjóleg samtök utanvegahlaupara, stofnuð 2013. Hlutverk þeirra er að vera bæði hlaupurum og hlaupahöldurum innan handar varðandi allt sem við kemur utanvegahlaupum. Það eru fjölmörg utanvegahlaup á Íslandi og erlendis skráð hjá ITRA og þeim fer fjölgandi. ITRA gæðametur utanvegahlaup út frá vegalend og samanlagðri hækkun ásamt því að birta úrslit úr utanvegahlaupum. Hægt er að skoða þessi hlaup á heimasíðu ITRA undir flipanum "races". ITRA heimsíðan er: www.itra.run

ITRA gefur hlaupara stig eftir því hversu hratt hann fer viðkomandi hlaupaleið, frá 0 til 999. Þeir hröðustu fá hæðsta stigaskorið o.s.frv. Það eru um 7.400 íslenskir utanvegahlauparar í gagnagrunni ITRA og meðaltal íslenskra hlaupara eru um 430 stig, sjá mynd hér fyrir neðan. Ef þú hefur tekið þátt í utanvegahlaupum síðustu ár eru mjög miklar líkur á að þú sért nú þegar í gagnagrunninum og sért skráð/ur með stig.  Stig eru reiknuð sem meðaltal besta árangurs í utanvegahlaupum síðastliðin 3 ár. Ef þú hljópst t.d. Laugaveginn 2021 þá ertu með stig fyrir þann árangur. Önnur utanvegahlaup síðastliðin 3 ár (36 mánuði) gefa þér einnig stig, eins lengi og þau hafa verið gæðametin af ITRA.