Drykkjarstöðvar

Þjónusta verður á drykkjarstöðvum, en hlauparar því hvattir til að bera með sér sína eigin næringu. Starfsmenn munu aðstoða hlaupara við að fylla á drykkjarílát sem hlauparar eru með á sér og rétta þeim þá næringu sem þeir biðja um.

Aðaldrykkjarstöðvar eru við Hrafntinnusker, Álftavatn, Emstrur og Þórsmörk þar sem boðið er upp á drykki (vatn og Gatorade). Einnig verða drykkur á leiðinni, á Söndum, við Kápu og þröngá og svo er hægt að drekka lindarvatn úr lækjum og ám eftir árferði. Sjá nánar í meðfylgjandi töflu.

Vegna umhverfissjónarmiða verða engin glös eða drykkjarílát á drykkjarstöðum og verða því allir þátttakendur að koma með sitt eigið. 

Athugið að á drykkjarstöð við Sanda er aðeins boðið upp á 300ml af vatni á mann vegna takmarkaðra vatnsbirgða og við Ljósá er aðeins boðið upp á 450ml af vökva á mann

* einnig verður boðið upp á saltkodda með hnetusmjöri
** einnig verður boðið uppá ávexti í Húsadal.

Salerni

Salerni eru í Landmannalaugum, Hrafntinnuskeri, Álftavatni, Emstrum og Þórsmörk. Algjört bann er við losun mannlegs úrgangs utan salerna.

Talning og öryggisþjónusta

Starfsmenn á hlaupaleiðinni sjá um talningu í öryggisskyni við Álftavatn og Emstur og gæta tímamarka þar. Einnig veita þeir öryggisþjónustu yfir þær ár sem talið er að hjálpar sé nauðsynlega þörf.

Auka farangur

Auka farangur þátttakenda verður fluttur að Bláfjallakvísl. Athugið að þessi farangur fer beint til Reykjavíkur eftir hlaup, hann fer aldrei í Þórsmörk. 

Starfsfólk

Starfsfólk Íþróttabandalags Reykjavíkur sjá um skipulag og framkvæmd Laugavegshlaupsins, þau eru staðsettir við upphaf hlaups í Landmannalaugum og á marksvæði í Þórsmörk. Starfsfólk hlaupsins á leiðinni eru hlaupahópur frá Selfossi, Frískir Flóamenn og björgunarsveitarfólk úr Björgunarfélagi Árborgar frá Selfossi. Alls eru það fimmtíu aðilar með fimm fjallabíla sem þjónusta hlaupara á leiðinni. Aðrir starfsmenn eru staðsettir í Húsadal og eru þeir flestir sjálfboðaliðar úr röðum hlaupara. Læknir og hjúkrunarfræðingar verða staðsettir við endamark í Húsadal, einnig verður hjúkrunarfræðingur í Emstrum.

Að gefnu tilefni skal það tekið fram að á stórum hluta leiðarinnar eru starfsmenn ekki sjáanlegir. Gengið er útfrá því að þátttakendur hafi kynnt sér vel leiðarlýsingu og séu þannig búnir að þeir geti beðið lengi eftir aðstoð ef upp koma meiðsli eða annað óvænt.

Ábending

Algengt er að hlauparar noti gelnæringu í litlum plastumbúðum sem ekki eyðast í náttúrunni. Reynslan hefur sýnt að gelbréfin eru stundum að detta úr beltum hlaupara og eftir notkun hafa hlauparar einnig lent í því að þau hafa fokið úr höndum þeirra. Því eru hér vinsamleg tilmæli um að þátttakendur hætti alfarið að nota þessi gelbréf en setji næringuna frekar í plastbrúsa sem þeir geta haft t.d. í brúsabelti.

Þjónusta við þá sem hætta á miðri leið

Starfsmenn hlaupsins aðstoða þátttakendur, sem ná ekki tímamörkum við Álftavatn og/eða í Emstrum. Þátttakendum verður ekið að Hvolsvelli og síðan til Reykjavíkur, ekki er hægt að fara inn í Þórsmörk. Þess skal getið að ferðalagið frá Álftavatni og Emstrum að Hvolsvelli getur tekið 2-3 klst. eða lengur og bið á Hvolsvelli getur varað í nokkrar klukkustundir. Að flytja þátttakendur með bíl á milli skála er tímafrekt og eingöngu hugsað sem neyðaraðstoð.